المهدي الخماس: كل سنه وأنتم بخير 24/12/2015 02:57 المهدي الخماس: كل سنه وأنتم بخير
المهدي الخماس بحث

مرحبتين بكل خوتنا الليبيين واخواتنا الليبيات. حبيت انقول للجميع كل عام وهم/وهن بخير وسلام وامان. المناسبه ذكرى ميلاد سيدنا محمد عليه الصلاة والسلام. الحاجه بارك الله فيها ناضت معايا وبعد ماصلت الفجر مشت للمطبخ ودارت لنا عصيده على كيف كيفك. تسلم أيديها وربي يعطيها الصحه ويسلمها. وكلمنا الوالده والاهل وباركنا لهم بالميلود. طبعا اللي فيه من بلغني انها بدعه. واللي بلغني ان سيدنا ابوبكر حكم سنتين ولم يحتفل بمولد النبي (ص). الخليفه عمر بن الخطاب حكم 10 سنوات ولم يحتفل بمولد النبي (ص). 

كويس انا حبيت أتذكر سيدنا محمد (ص) في عيد ميلاده. ايش المشكلة. انا مازدت او نقصت في أمر عباده. ولا قلت عليكم بالاحتفال به ولاقلت سُنَّه. اللي خاطره في عصيده مرحبتين. اللي يبي يقوم يصلي على سيدنا محمد (ص) ايضا براحته. لكن الله يستركم ويسترنا خلّونا ننبسطوا بعيد ميلاد أفضل الخلق. انا لاقلت اطلعوا ارقصوا وطبلوا ولاقلت اعملوا الموبقات.

في حاجه ثانيه حتى هي تعز عليا. الا وهي استعمال السبحه. مرات انعد بالأصابع وكثير من الأحيان نعد بالسبحه. ماشيه أموري والحمد لله. مره مره أيوقظني حد انها بدعه. باهي ايش رأيك في الصلايه. والصلايه اللي فيها بوصله والصلايه المزركشة. وايش رأيك في كاميرا سمحه وصورة الجد والعائلة قعده ذكرى من عشرات السنوات. تبي الحق ممكن أننا كثرنا اشويه من حكاية البدعة.

انا فهمي بسيط جدا. إذا انت إطلعت وقرأت وسألت وأستنتجت ان أمر الذكرى او الاحتفال أو العصيده بدعه وخفت من ارتكاب ذنب فلا تحتفل ولاتهني. وإذا انت إطلعت وقرأت وسألت وأستنتجت ان أمر الذكرى او الاحتفال أو العصيده ليس ببدعه وإنما ذكرى ميلاد النبي الحبيب  ولاخوف من ارتكاب ذنب فاحتفل وكل العصيده  وهني عائلتك وأصحابك.

ياريت ماتحاولش تفرض عليا رأيك.  كثير من الأشياء لم يعملها الصحابه ربما لاختلاف في طباع وعادات المجتمع او ربما لانها حدثت أكثر من 1400 سنه ماضيه. ياسيدي سيدناعمر ماخرّبش تمثال ابوالهول وغيره من تماثيل الفراعنة المصريين ولاخرّب تماثيل بوذا في أفغانستان. سيدنا عمر كان يخاف أن يظلم أحد في عهده واحنا قتلت الأدمي أسهل من اصطياد الغزال. 

في عهد سيدنا عمر ماكان عندهم الفيس ولا الفيبر ولانقال ولاطياره ولاكاميرا. وكان عندهم التائب والشجاع والخائن والزاني والمنافق. واللي متزوج اربعه واللي موش لاحق على واحده.

يعني ربي خلق الحياة ألوان وبين لنا صعوبة الطريق الى الجنه واللي بيمشي فيها مرحبتين واللي موش عاجبه واختار طريق أخرى بسلامته. اليومين اللي فاتوا سمعت زوز زملاء مسلمين يتناقشوا وأحدهم قال الى الاخر ،،لكم دينكم ولي ديني... موش معقوله اختلافنا إلى هذه الدرجه. 

مره ثانيه كل عام وأنتم بخير وليبيا أكثر وحده وأمن وسلام. ودمتم بخير.

المهدي الخماس

 

إضغط هنا للتعليق على الموضوع
Reader's Comments
أسامة عزيز
من تكلم في غير فنه أتى بالعجائب .. واضح أن تخصصك بعيد كل البعد عن الشريعة، لذلك وحتى يفهم الكاتب ومن يدور مثله في فلك العصيدة والفتات يلزمه أصول ليدرك…...
التكملة
خالد رمضان
واحد صديق قالي أن العصيدة أصبحت رمز شعبي لمقاومة العزو الوهابي لثراتنا الليبي. قالي أذخل للفيس بوك وشوف. كل سنة وجميع الليبيين بخير....
التكملة
مفتاح رمضان الطيار
يعتبر الدكتور المهدي الخماس من انجح الاطباءفي جراحة وزرع الكبد والبنكرياس ،حصل على العديد من شهادات التقدير لنجاحه وكتاباته وبحوثه. تحية وتقدير لمن اعتبره نموذجافي النجاح والتفوق ولا انسى حسه…...
التكملة
wael krekshi
miloud sa3eed doctor, nice easy speech, keep on. salam...
التكملة
صالح حويل
يا استاد مهدي، مش عصيدة بس؟؟ اووو ثاني يوم االغداء لابد ايكون افتات ، افتات علي طبيخ وفوق منها لحم حولي !!! ياعيني ياعيني.. هكدا نحتفل بمولد النبي محمد (ص)…...
التكملة