أبناء باب البحر وسيدي خريبيش وزواره بالاكيد يفهموا في هذا الموضوع أحسن مني. على كل في بعض الأحيان أشعر أن التفكير ينطبق علينا.
خليني الاول نقول لكم ماذا تعني عقلية سرطان البحر. جميعنا يعرف عقرب البحر (سرطان البحر). لو حطيت عقرب واحد في السطل فإنها تستطيع التسلق والهروب من السطل. مافيش مشكله أبدا. حط معاها مجموعة عقارب ونام مطمئن. يعني ماتحتاجش تغطي السطل. لأنها لاتستطيع الهروب. علاش؟
الاجابه ساهله. لانه كل ماتحاول سرطانه التسلق والهروب من السطل أخواتها الحنونات وخوتها الحنونين يجبدوها تحت وتسقط في قعر السطل مره ثانيه. وتبيلها باش يوصل فيها الدور وتحاول مرة أخرى محاوله فاشله.
هل نفكر بهذه ألطريقه في بعض الأحيان؟
باهي لو احنا بطلنا من جبدان بَعضُنَا الى تحت واستريحنا وخذينا نفس بالأكيد نقدروا انشوفوا الى قدام وربما نعرف ان مصلحتنا في الوحدة ومصلحتنا في البعد عن عقلية سرطان البحر.
تعالوا معاي بنديروا اشوية مراجعه وحسابات مع بَعضُنَا...
في نهاية الأربعينات الحلفاء ساعدونا والامم المتحدة صوتت وعطونا استقلالنا بعد فتره طويله من الجهاد والصبر والحنكة. عطونا ليبيا واعترفوا لنا ببلاد امصنّعه امنّعه وفيها حدود وفيها شط. وطلقونا فيها مليون ونصف. طبعا بعد ماقتلوا وهجروا زيهم. المهم كان اعتقادهم اننا حنذوحوا ونريحوا بشواهينا وحميرنا في الصحراء وممكن حتى نموت بالعطش.
وياللقدر... الشعب الليبي طلع فالح والملك طلع راجل حكيم واكتسب خبره سياسية وعاند ولمّد وخيط الشكاره ودار مملكه مع حكماء الوطن وطلع فيها بترول. قاللهم انا نبِّي البترول يخدم الليبيين اولا وبعدين كان زادت علينا حاجه انساعدوا غيرنا... قاللهم نبوا مدارس ومستشفيات وطرق وجيش وشرطه...الخ.
المهم ماعجبهمش الكلام وبرا يازمان وتعالى يازمان مشوا مشوا وريحونا في متاهه لمده اكثر من أربعين عام. مره ايقولوا الشعب الليبي ذلال ومره ايقولوا خاين ومره ايقولوا مستحيل يطّلع من القبضه الحديديه. واخير طلع ودار البهاذل في روحه.
توا وصلنا في الحسابات بالارقام. فيه اختلافات بسيطه في بعض المواقع...
لما عطونا ليبيا كانت مساحتها ١٧٥٩٥٤٠ كيلو مربع. يعني اكبر من مساحة فرنسا وألمانيا وبريطانيا وإيطاليا مجتمعه. لما تقسم مساحة الدول هذي كلها على مساحة ليبيا تطلع (٠٫٨٩ (١٥٧٨٤٨٨٪١٧٥٩٥٤٠)...
فرنسا =٦٧٥٤١٧ السكان = ٦٥٨٢١٨٨٥
ألمانيا = ٣٥٧٠٢١ السكان = ٨٠٦٢٠٠٠٠
بريطانيا = ٢٤٤٨٢٠ السكان = ٦٤٥٩٦٨٠٠
إيطاليا = ٣٠١٢٣٠ السكان = ٦٠٧٠٥٩٩٠
عدد السكان مع بعضهم يساوي ٢٧١٧٤٤٦٥٧
يعني حصة المواطن في الليبي من الارض تساوي ٤٦ مره حصة المواطن في الدول الاربعه... يعني لازم انفكروا كيف انحافظوا على ارضنا من الحساد والشمايتيه.
ودمتم بخير
